الفرح راسم وشها

قابلت الحزن صدفه ماشى وماسك ف ايده الصبر

اتخضيت وجريت بسرعه حفرت للحزن قبر

و ف الضلمه لفيت وراه و طعنته بكل قوه وشر

و دفنته وبالتراب غطيته شبر شبر

بصيت لفوق لقيت الحزن بيقولى

يا حلو اللى انت دفنته دا كان الصبر

****************************

بيقول قال لسانك حصانك

و يكون فراوله ومانجه كمان عشانك

ولو يوم عملها وفكر وخانك

يا عم فكك هوا مين ف الخلق صانك

****************************

كان ويا ما كان وكان لدنيتنا الجميله الف وش

وش يخلى الناس بتضحك والتانى يخلى الناس تكش

انا كان كل حلمى يكون لى فيها و لو حتى عش

بصتلى الدنيا و قالتلى روح يا بنى هش

ما انا اصلى كنت غلبان ومن الحياه بنش

بس عرفت انك علشان تعيش لازم تدى للدنيا دى وش

***************************

صباح الخير على عيونك يا بيه

معلش حسنه دا انا محتاج جنيه

انا عندى ياما راح اقولك عليه

سبحانك يا ربى هوا الكدب بقى عاده فينا ولا ايه

***************************

اجرى و الحقلك مواصله و زنق و دوس

دا الواحد بقى راكب ولا كأنه ف كابوس

وعم الأسطى همه كله يلم الفلوس

و التباع بتاعه بيهين الزباين على وجه الخصوص

تيجى محطتك هتنزل وتنسى

و للوشوش كمان راح تبوس

***************************

كان نفسى اكون ف الحب استاذ و طالب

اعلمه واتعلم منه و امر الحب غالب

لحد ما وقعت فيه و من غير مطالب

لقيتنى يا ما خدت فيه م الناس مقالب

تبت و بقيت من بعيد لبعيد براقب

***************************

شفته وسط الزحمه واقف ضعيف

و الحزن راسم ملامحه على خفيف

و طيت عليه و قلت مالك

الدنيا لازم تاخد منك و انت برده للدنيا لازم تضيف

بص لفوق وقالى يا استاذ

انا كل ذنبى انى حاولت اعيش شريف

****************************

الفرح زى جناح يمامه راسم وشها

و مد ايديه لأمواجه البعيده هناك شدها

ضحكت كتير لحد ما الدموع سالت على خدها

حضنت جواها قلبى و قلوب الناس كلها

دى حبيبتى زى حباية الندى لو الف الدنيا ما الاقيش زيها

الحياه مع فنجان شاى

يااااااااااااااااااااااه اليوم دا كان حاجه كده
كان فى لسعة برد بس الهوا كان بيطبطب على خدودى بيقولى صباح الخير
و النفس اللى كنت باخده بيدخل ينعش كل حاجه حلوه جوايا
و الشمش برغم اننا ف الشتا و هيا مابتخرجش كتير الا ان ماهنش عليها
تخلف معادها معايا فجت و دفت قلبى و يدوب حضنتى و مشيت علطول
انا كنت مبسوطه اوى يمكن عشان الأيام دى بتيجى على سهوه فلازم
نكلبش فيها و ما تعديش مننا كده و لازم نحفرها جوانا عشان نمسح
بيها الأيام التانيه المغيمه.

********************

حياتنا عامله زى جورنال كبير بنقعد نقرأ غيرنا وهوا كمان بيقرأنا فيه
بتهمنا اوى العناوين الرئيسيه لكن التفاصيل ايه مش مهم
و بتشدنا اوى اخبار الحوادث لكن الأفراح ف ركن بعيد كده لواحدها
و دايما بنتمنى صورتنا تظهر ف الجورنال مش مهم هيتكتب تحتها ايه
المهم انها تظهر برغم انها بتتنسى واللى بيعلم هوا الكلام اللى عليها .

********************

الزمن دا عامل زى البحر لما تيجى مايته ع الشط يا اما بيمسح
حاجات قديمه يا اما بيظهر حاجات مستخبيه تحت الرمله
فى ناس اول ما تقابلها تحس انك مش عايز تعرفهم
و لما تعرفهم تكتشف ان ليهم جنحات ملايكه بس انت ما كنتش شايفها
و ناس تلاقى قلبك اول ما شافهم جرى وراح عليهم
و بعد كده يبقى هاين عليك لو كنت قطعت عليه الطريق
الزمن بيمسح الرمله عن كل الناس و اول الناس دى هيا انت .

********************

"بتحبى ………….؟" سؤال بتسأله كتير اليومين دول
مش معنى انى احيانا بضحك من غير سبب و احيانا ببقى طايره من السعاده .... انى بحب
و مش معنى انى بقيت بكتب اكتر من زمان او بستمتع باغنيه حب حلوه .... انى بحب

الفكره كلها انى بدأت أحبنى و اكتشفنى و اعرفنى بجد.. بس مش اكتر
و يا ريت كان جواب السؤالدا اه .. بس ساعتها معرفش شكلى هيبقى ايه .

لون جديد للشخبطه

شبيك لبيك نفسك ف ايه
ايه دا جيت ف وقتك يا اسمك ايه
تعالى اقعد اقولك ع اللى انا نفسى فيه

نفسى اصحى كل يوم الصبح على صوت كناريا مزقزقه
و شمس دافيه باصه علينا مروقه
و جايبه فى اديها شويه مطر
يخلى الدنيا نضيفه مزوقه
و الكون للحظه يكون بتاعى ومن غير تريقه
تعرف بقى

- هو دا اللى نفسك تعمليه
- استنى بس مستعجل اوى كده ليه

نفسى الأيام الحلوه ما تعديش كده
عايزاها تمحى كل حاجه ملخبطه
و تعدى على ايامى اللى فاتت تمسح كل الشخبطه
و بلون جديد ترسم حاجات متظبطه

- استنى ما تسربعنيش بقى

انا عايزه كل يوم اسمع ضحكته التانيه اللى هيا
مش الضحكه الهاديه العاديه
لا ما هو اصله ليه ضحكه فرحانه وشقيه
و عيونه فيها حاجات كتير مداريه
تقدر تقولى اسراره دى ايه هيا

- لا دا انتى كده بتهزرى
- خلينى اكمل واسكت بقى

عايزانا نفرح زى عيال صغيره
عايزه احزانا تكون بعيده مخدره
و الأحلام قدامنا تكون متصوره
- ها خلاص كده
- لا بس لسه حاجه صغننه
انا نفسى ف رز بلبن
- بس كده و اهو يا ستى من غير تمن
- ما اقصدش دا انا عايزه واحد من بتاعة الحكاوى والدندنه
تعرف بقى ولا انت تعبت من كتر الشقا

أخر السطر : كل سنه وانتو دايما طيبين يا رب و تكون ايامكم كلها اعيا د واحشتونى جدا جدا جدا واسفه انى ماردتش ع التعليقات اللى فاتت
ظروف والله و مش بالحق اعمل اى حاجه
واحشتنى فاتيما وديدى مواجهات ومفروستى و ابى وكوكبها ورحيل و هبه وفيونكتها و ناس كتيره اوى
واحشتونى بجد وكل سنه وانتو طيبين

فانيليا بلون الشمس

الاحساس بالتوهه و الوحده غريب اوى بتحس كأنك فى وسط ليله برد
و بتمطر و انت واقف فى وسط الشارع لوحدك
بس حواليك ناس لابسه هدوم دافيه و ماسكه شمسيات
و انت اللى مخفف كأنك على شط اسكندريه ف
عز يوليو و حره ،لا انت عارف تستلف منهم شمسيه و لا انت عارف
تروح تقف تحتها جنب حد فعمال تجرى بتدور
على تنده او بير سلم تستخبى فيه لحد ما الشمس تطلع عليك او جايز
انت اللى لازم تمد ايدك و تشق السما عن شمس برتقانى
مدوره تدفى الدنيا من حواليك انا كان بقالى فتره بحاول اشق السما
لحد ما اخيرا لقيت الحاجه اللى نورت كل حته ضلمه من حياتى

***
اتلمينا امبارح وخرجنا
سرحت وبصيت علينا كده لقيتنا ملفوفين بجو دافى
اتكون من كلامنا وغمزنا وضحكنا على حاجه هايفه
كنا معزولين عن الناس و كانت ارواحنا مشبكه ايديها فى ايدين بعض
من غير ما نكون احنا كده، اتمنيت نفضل كده علطول
و الدنيا ما تخدناش وننسى اللى بنكون نفسنا مش حد تانى معاهم

***
"اول مره اشوفك بتضحكى ف صوره "
الكلمه دى قالهالى اخويا قلت لأنى اول مره اكون مبسوطه كده
لأول مره انسى انى بكره اتصور و كل اللى كنت بفكر فيه انى امسك اى لحظه من اللحظات
اللى عشتها بجد مش عديت عليها كده كأنها متخصنيش
وعشان كده الصوره طلعت احلى صوره اتصورتها

***
"عمرك حبيتى.... لأ كان بان عليا "
بالنسبه لى الحب دا عامل زى ما تكون دخلت حقل للفانيليا
اللى بتكون ريحتها نفاذه مثيره للأحاسيس
و بتحوطك من كل حته ومسام جسمك بتتنشقها بنهم
و بتسرى جواك لحد ما تبقى جزء من تكوينك
الداخلى والخارجى بتتعرف بيها فى اى مكان تروحه
الحب كده برده بيتعرف فى اى مكان و بيعرف عن صحابه
***

فى الأخر : بعتذر انى مردتش على تعليقات الناس وانى ما دخلتش مدونات من زمان
بس بجد انا مطحونه مذاكره يدوب بنام ان شاء الله ادخل تانى زى الأول

سلام مؤقت

عيييييييييييد سعيييييييييييييييييد جدا

كل سنه والناس كلها بخير و طيبين و يتقبل الله منا ومنكم رمضان
يا رب وان شاء الله ارجع اكتب تانى بعد العيد
ملحوظه : انا مبسوطه جدا -و دا ما بيحصلش كتير -
و بحب الناس كلها و بتمنى للناس كلها الخير

سلام مؤقت